Willkommen auf der Website der Gemeinde Oberwil



Sprungnavigation

Von hier aus k?nnen Sie direkt zu folgenden Bereichen springen:
Startseite Alt+0 Navigation Alt+1 Inhalt Alt+2 Suche Alt+3 Inhaltsverzeichnis Alt+4 Seite drucken PDF von aktueller Seite erzeugen
vorhergehendes Ereignis | nächstes Ereignis

Dr Ysweyer

 

Dä scheen, gross Ysweyer, won eys zue myner Jugendzyt s greeschti Vergniege het chenne biete, isch hitten e Sportplatz worde. Wuchelang isch dä Weyer als gfrore gsi, un so hei mir Schuelchinder lehre Schlittschue fahre. Mir hei als statt Durnstund derfe mit em Lehrer uff e Weyer go, zue eyserem bsundere Vergniege. Won y emool speeter an ere Wienecht verniggleti Schlittschue ibercho ha, isch das eini vo de greeschte Freyde gsi, aber aagschrubt an d Schue hei si doch au miesse wärde, wie anderi.

In dr Mitti vom Weyer isch als en Inseli gsi, und d Buebe hei wie wild Ziggi drum umme gmacht. Me isch immer in Gfohr gsi, umgschupft z wärde.

Vo Basel sy als au Schuelklasse uff dä gross Ysweyer cho; s isch vo dr Bähnlistation nummen e paar Schritt gsi zem Weyer. Es isch en Unterschied vo de Stadt- un Landchinder gsi, aber mir hei doch e Stolz gha, ass die Städter hei miessen uff s Land, uff sone grosse Ysweyer cho Schlittschue fahre.

Am Sunntig, do isch Betrieb uff däm Weyer gsi, do het d'Oberwiler Muusig im Pavillon gspielt, un sy hei uff de Schlittschue danzt drzue. S het nadyrlig au Ydritt koschte, am Sunntig mehr ass am Wärchtig. S isch als by dr Birsigdalbahn-Station z Basel aagschriebe gsi, wie spiegelglatt dr Oberwiler Ysweyer syg, un me het grad mit em Billet zämme dr Ydritt chenne leese. Mir Oberwiler hei weniger zahlt, un z Nacht wenn d Bogelampe brennt hei, het s fir eys nyt koschte. Am Zähni hei si abglescht, aber vill sy no bliebe, wenn s hälli Nächt gsy sy.

Au Yskinschtler hei sälli Zyt scho ihri Kunschtstigg gmacht. Mir hei numme gstuunt un gluegt, was die uff ihre Schlittschue alles fertig brocht hei. Me het gmeint, wenn me linggs un rächts chenn bogelaufe, derno chenn me scho vill.

Mit Stoosschlitte, wo me met chenne miete, sy die Basler uff däm Weyer ummegfahre, mit noble oder alte Dame druff. Wo speeter Dännli um dä Weyer gsetzt worde sy, het das wunderbar zue däm Bedrieb ussgseh. Das het dr Sunntig no scheener gmacht, aber au vill kaputti Absätz, un dr Schuemacher Müller het als sträng gha, isch fascht nit noo cho so vill Absätz aanagle. D Buebe sy parat gstande fir Schlittschue aaschruube, wenn sy als nimmi ghabe hei.

Derfir het me no chenne Wienerli ässe un ebbis dringge derzue, un das hei die Basler gärn aagnoo.

Wenn aber drno dä Weyer daut isch un die Buebe glych no hei welle fahre, do isch mängge in Weyer gheyt. My Brueder het sich das Vergniege au gleischtet un y weiss no, wie sy Bricht heim brocht hei: Eyere Bueb isch in Ysweyer gheyt.

Au wenn sy dr Weyer abgyst hei, sy die Buebe vo einer Blatte uff die anderi gumpt, un s Glych isch passiert. Me het dert die Blatte in e grosse Yschäller transportiert, un e mängge Ma het Arbet gha. Y glaub, die Yszyt isch fir vill non en Erinnerig vo Scheen und Schregge.

Däm Ysweyer cha me mit Rächt noodruure, au no vill anderem, wo so unbeschweerti Freyd in eyseri Jugendzyt brocht het. Hitten isch au im Summer Läben uff däm Platz, un fir die Junge immer vill Vergniege mit Sport un Fescht. Me cha halt die alte Vergniege nimme zrugg hole un au eys Alti nit nomool jung mache,aber d Erinnerig isch doch bliebe!

Pauline Müller-Düblin, Vo friehjer
E Hampfle Erinnerigsbilder us Oberwil
Selbstverlag

zur Übersicht



Hallenbad Oberwil
Energiestadt